Teknoskopioa, 2. fasea. berriro egin dugu !.

PRENTSA-OHARRA

  Elorrio Institutuko ikasleak Teknoskopioa ideia-lehiaketan jaun eta jabe.

1. fasean bezala, 2. fasean ere Elorrio Institutuko beste bi ikasleen bloga izan da garaile. Lehiaketako 3. eta azken fasea ere martxan da eta maiatzaren 31ra arte iraungo du.

Usurbilen, 2010eko apirilaren 23an

  Elhuyar Fundazioak eta Innobasquek antolatzen dute Teknoskopioa gazteentzako ideia-lehiaketa. Martxoaren 31n amaitu zen 2009-2010eko lehiaketaren bigarren fasea, eta Elorrio Bigarren Hezkuntza Institutuko 4. mailako ikasle Intza Olabarria eta Miren Arriagaren bloga, “Darwin Elorrion 2” izan da irabazle. Ordenagailu ultraeramangarri bana jaso dute bi taldekideek.

  Lehenengo edo bigarren faseetan parte hartzeko aukera galdu zuten ikasleek edota parte hartuta ere irabazle izan ez zirenek, 2009-2010eko Teknoskopioaren lehiaketako 3. fase honetan dute parte hartzeko azken aukera.
  Apirilaren 1ean abiatu da fase berria, eta talde guztiek hasieratik hasi beharko dituzte blogak. Azken fase honetan, gaur berriz ere meteorito bat eroriko balitz zer eragin izango lukeen eta zein beste bizitza izango genukeen Lurrean imajinatzea izango dute eginkizun.

  Teknoskopioan, hamalau urtetik hemezortzira bitarteko neska-mutilek har dezakete parte, gehienez hiru laguneko taldetan antolatuta. DBHko bigarren zikloko, Batxilergoko eta Lanbide Heziketako ziklo ertaineko ikasketak egiten ari diren ikasleentzat da lehiaketa, eta aurtengoak seigarren edizioa du.
  Gainera, hezkuntza-sistemaren beharretara hobeto egokitzeko, aurtengo lehiaketak 6 hilabeteko iraupena izango du, 3 fasetan banatuta —2009ko abendutik 2010eko maiatzera —.
  Parte-hartzaileei fase bakoitzera edo lehiaketa osora apuntatzeko aukera emango zaie. Fase bakoitzean blog bat sarituko da, eta egileek ordenagailu ultraeramangarri bana jasoko dute.

  Ideia-lehiaketa honi buruzko informazio guztia www.zientzia.net/teknoskopioa webgunean dago. Bertan, lehiaketaren xehetasunak aurkitzeaz gain, antolatzaileek gaiari buruz prestatutako material didaktiko osagarria dute eskuragarri parte-hartzaileek. Aurreko edizioetako probak ere ikus daitezke.